कुछ बासंती छंद ...

चिड़ियन  सी चहक चमक चंचलता चपला सी ,
चंदा  की  चाँदनी   सी  चित  की  सितलाई है |
चन्दन  सी  चारु  महक  चटकीली  चंपा  सी ,
चकित    चकात   जात    चटक   गोराई   है |
कचक  कचोट चोट  चितवनि  सुलोचनि की ,
रुचिर    सुचक्री      चितचोरनी     बनाई  है |
चकई  चकोर  प्रीति   चलत  सुचाल  ब्याल ,
चित चोरिबे  को चली   चित  में   समाई  है |

लखिकै चहुँ ओर  सुनैनन सों  जस मोरनी कंठ  घुमाय गयी |
चमकी-दमकी बिजुरी बनिकै  बिजुरी जियरा पै गिराय गयी |
रूप की रानी सयानी जवानी सों पानी मा आगि लगाय गयी |
उर पीर उठै  न घटे  न बढे  अस  नैन सों  तीर  चलाय गयी  |

सखि लागेहु बौर रसाल की डाल सुगंध समीर हू डोलन लागे |
फूलि रहीं सरसों  अलिहूँ सखि !  कोष पराग के खोलन लागे |
प्रीति भरी रससानी सी बानी में कोकिल को मन बोलन लागे |
स्वाती के बूँद लखौं अजहूँ पिय आये नहीं कछु नीक न लागे |

ऋतुएँ नहि सोहैं बसंत बिना  निशि चंद बिना  कवि छंद बिना |
नहि सोहै सुमन मकरंद बिना जिमि कामिनि प्रेम प्रबंध बिना |
भगवान न सोहत भक्त बिना   वन सोहै   न  मत्त गयंद  बिना |
छलकै रस कुम्भ  सुरेन्द्र चहै  पर  नारि  न सोहत कंत बिना |